TAMURT

Neǧǧa slam i zik nni

Ddunnit tɛawed aɛammur,
neǧǧa slam i zik nni,
yal w' amek i d as teḍṛa,

timura beddlent tikli,
nebdatt-id si tessirt n ufus,
tur' aqlaɣ di l' industrie,
lɣaci yeggwet de wmaḍal,
yal wa yettra sa patrie,
anw' ar' a d yinin: mačč' akka?
ɣas ma d amdan ur neɣri,
yecṛeq yiṭij yulli wass,
tecɛel tafat ur txetti.
Tura d zman n tugdut,
timura yessefk ad akwint,
ifuk yitler d staline,
tisnuṛaf ur swint,
iɣulad n lbaṭel ɣlin,
tigejda ines rurint,
izerfan n wemdan a gma,
ma d lmeḥqur ssulint,
axiṛ ma neswa deg wceṛcuṛ,
neɣ a tt knuḍ ar taɛwint.
Nekwni ur nexdim kra,
teqwel tmeɣra d amyuqen,
a cemma n sidi ɛemmaṛ,
wid tt icummen ad friwsen,
d fṛansa neɣ d marikan,
nettwali amek xeddmen,
ur sɛin lgaz d le petrole,
s tussna kan i mehhlen,
ernan-as ṛay d lɛic,
anida ddan a d ɛemmṛen,
ma yella tegreḍ tiɣri,
ad ddun yidek a k mmlen,
yal wa yettnadi nfeɛ-is,
ur ttaǧǧan deg wezref nnsen,
mudd afus-ik tetebɛet,
ma teneḥwaǧǧeḍ ɣersen.

Sɣur: Amar Tafat, ass n 26 nwambeṛ 2011

XIBUC

Ttcekiṛṛen medden aweṭṭuf,
heddṛen kan imi yeḥṛec,
amek tecbeḥ tburregga,

amkan tezga iqecqec,
aweṭṭuf yeɣza Ddunit,
amɣid nneɣ armi yedhec,
d xibuc neɣ d wayeḍ,
aksum n wemdan a t yecc,
tawekka neɣ d aqawsas,
d aɣerda neɣ d imeqṛec,
ṣwab ɣursen ulac-it,
wḍen ar wefṛux di lɛec...

Sɣur, Amar Tafat ( extrait du poème )

Ay ixef-iw ignen yesṛeɛ
ur k ẓẓiden iɣuraf
tidett isgaǧ-itt ṭmeɛ
tuɣal d ṛefṛaf
mt' ara d iḥdeṛ lejmaɛ

tneggzeḍ qqaṛeɛ
kul wa yuɣal d aɛellaf
ad ẓreɣ aḥbib di litteɛ
d ccab nni axalaf
ineɣ-as ad infeɛ
di lhezza a t naf
izwir-i ḥed ifka ṛbeɛ
iqleb ixeṛweɛ
taqbaylit tuɣ azraraf.

asefru n Muḥ at Lmesɛud
" Qqaṛen azrem ɣef uɛebbuḍ-is i-gleḥḥu "

Yella ur t yugar wulac

A taseṭṭa n tjilbant,
tina yewwet ubuseṭṭaf,
deg weqwiṛ tbedd am lexyal,

yeččatt aw uzerkweṭṭaf,
win icuban ar tillas,
isem-is talwit neɣ ccwal ?
Deg gberdan ur d iqqim sser,
nwala awezɣi d lmuḥal,
zheṛ taggar ya yerwitt,
yeččuṛ udellaɛ d ubuqal,
yella ur t yugar wulac,
yal amussnaw d aɛeqqal,
iwwet ed ubeḥri yettlawac,
iɛǧeb asen i lɛuqqal,
tamaziɣt attan xiṛ n zik,
tura tuɣal d lecɣal,
imassanen d imussnawen,
yal wa yessmar-as acḥal,
ay Imaziɣen ssɛut nnif,
ma teččuṛ ur tt nessenɣal

Amar Tafat

IDLES AMAZIGH
ASEFRU N YUSEF U QASI, DEGS TAMUSSNI D USALLI :

Alebɛaḍ ma yṣufeṛ eddu,
ma tella cedd' a k yemnaɛ,
... ad fellak igzem am ɣeddu,
nett' i gḥemmel d afara,
alebɛaḍ am usendu,
deg yir awal i getwella,
ad ak isefṛeḥ laɛddu,

a k isebddad di lmeḍlaɛ,
yir lǧaṛ m' i k yetɛeddu,
degs janeb negh ṛuḥ qlaɛ,
di Ddunit ur k ifeddu,
di laxeṛt ur k ittcafaɛ,
am wemkan akeffadu,
degs izem degs aqeṭṭaɛ